Snemma árs 2022 bárust mér í hendur gamlar ljósmyndir úr móðurfjölskyldu minni. Þar var viðamest myndaalbúm Hannesar Thorsteinson, langömmubróður míns, með myndum af fjölskyldunni og frá ýmsum stöðum á landinu. Ég skannaði allar myndirnar, gerði vef með myndunum frá Hannesi og afhenti góssið svo Ljósmyndasafni Íslands (sem er hluti af Þjóðminjasafninu).

Sumar gömlu myndanna áttu ekki samleið með albúmi Hannesar en ég hafði þó hug á að koma þeim á framfæri við áhugasama ættingja og vini. Allar myndirnar á þessum vef tengjast kvenlegg fjölskyldu minnar og því hef ég raðað þeim upp í tímaröð með konurnar í forgrunni. Undir mörgum myndanna er hnappurinn Meiri skýringar og þar birtast meðal annars nöfn allra þeirra sem eru á myndunum. Með nokkrum hópmyndanna er líka hlekkur á vefsíðu þar sem tengsl fólksins á myndinni eru sýnd myndrænt.

Allir sem birtast á myndunum í þessum vef eru nafngreindir. Það hefur oft kostað heilabrot og kallað á aðstoð úr mörgum áttum. Ólafur Sigurðsson og Helga Kjaran hafa lagt þar mikið til og úr Fésbókar-hópnum Gamlar ljósmyndir hafa komið góðar ábendingar. Edda Þórarinsdóttir systir mín er meðhöfundur að þessum vef og átti í handraðanum nöfnin á öllum á hópmyndunum við Höfða.

Vefurinn er opinn fyrir viðbótum, bæði fleiri myndum og frekari upplýsingum.