Mynd 19A. Á bakhlið hennar er skrifað:
Kaldaðarnesi 11/9 1895.
Athugasemdir:
Fjölskylda Sigríðar Jónsdóttur og Sigurðar Ólafssonar sýslumanns í Kaldaðarnesi undir vegg íbúðarhússins. Kaldaðarneskirkja til hægri. Talið frá vinstri: Steingrímur Johnsen (1846-1901) söngkennari, Sæmundur Eyjólfsson (1861-1896) búfræðingur, Ólafur Þormóðsson (1826-1900) faðir Sigurðar sýslumanns, Sigurður Ólafsson (1855-1927) sýslumaður Árnessýslu, Haraldur Sigurðsson (1892-1985) síðar píanóleikari í Kaupmannahöfn, Guðlaug Sigurðardóttir (1878-1935) dóttir húsfreyju síðar kennari, Halla Sigurðardóttir (1887-1966) síðar húsfreyja, Sigríður Jónsdóttir (1858-1932) húsfreyja, Ólafur Sigurðsson (1889-1928) síðar búnaðarkandidat og Jón Sigurðsson (1886-1957) skrifstofustjóri í Reykjavík. Samanber skráningu á mynd í Ljósmyndasafni Íslands í Þjóðminjasafni Mms 24101. Hinn ungi Jón Sigurðsson sem þarna liggur fremast á myndinni var í mörg ár skrifstofustjóri Alþingis og mikilvirkur þýðandi. Myndin er tekin á sama ferðalagi og myndir 7A, 18B, 19B, 20B, 21A og 21B. Steingrímur Johnsen er á nokkrum þeirra mynda. Hann var móðurbróðir og mikill vinur þeirra bræðra, Hannesar og Árna Thorsteinson, en hann var líka skyldur þeim í karllegg. Sameiginleg formóðir þeirra var merkileg kona, Valgerður Jónsdóttir (1771-1856) sem var gift tveimur biskupum. Fyrri maður Valgerðar var Hannes Finsen biskup (1739–1796) og eignuðust þau fjögur börn, þar á meðal Þórunni (1794-1886) sem giftist Bjarna Thorsteinson stiftamtmanni (1781-1876). Þórunn og Bjarni voru amma og afi þeirra bræðra, Hannesar og Árna. Seinni maður Valgerðar Jónsdóttur var Steingrímur Jónsson biskup (1769–1845) og áttu þau saman soninn Hannes (1809-1885) sem tók upp ættarnafnið Johnsen og var faðir Steingríms Johnsen söngkennara og Þórunnar Thorsteinson, móður bræðranna. [Nafngreining: ilb]
Sjá einnig Gamlar ljósmyndir á FaceBook