Forritunarmálið JavaScript

Þegar talað er um er í rauninni verið að tala um tvennt:

Forritunarmál (JavaScript, VBasic, ...) sem hægt er að hafa á vefsíðu og keyrir í vefsjá
Vefsíðulíkan (DOM) sem inniheldur hluti sem forritunarmálin geta stjórnað

Algengasta forritunarmálið á vefsíðum er JavaScript, vegna þess að flestar vefsjár styðja það. Málið kemur upphaflega frá Netscape (og hét fyrst LiveScript) en hefur nú verið staðlað af óháðum aðilum og má með réttu kallast ECMAscript. Hjá Microsoft er það kallað JScript.

Góðu fréttirnar eru að nánast allir útfæra JS með sama hætti, þannig að hér er raunverulega um staðlað forritunarmál að ræða. Vondu fréttirnar eru að ekki er samkomulag hvernig DOM hlutinn er útfærður. Segja má að a.m.k. þrjú líkön séu í gangi, frá MS, NS og W3C, og þeim ber engan veginn saman. Ákveðin grundvallaratriði (eins og aðgangur að innihaldi í formi) er staðlaður, en í grundvallaratriðum hefur útfærsla Microsoft og Netscape verið mjög ólík. Microsoft hefur í meginatriðum fylgt stöðlum W3C (með viðaukum að sínum hætti) og það líkan er hér lagt til grundvallar.

Þessar vefsíður um málfræði JavaScript forritunarmálsins eru miðaðar við fólk sem hefur fengist við forritun í einhverju öðru forritunarmáli. Þannig er lítið fjallað þau atriði sem telja má til almenna grundvallaratriða í forritun, en frekar reynt að benda á sérkenni JavaScript sem forritunarmáls.